Um KEF

Isavia ohf. tók við rekstri Keflavíkurflugvallar og Flugstoða 1. maí 2010. Félagið var stofnað til að sameina rekstur allra flugvalla og flugleiðsöguþjónustu í landinu. Félagið annast einnig þjónustu við flugrekendur, rekstur verslana með tollfrjálsar vörur og aðra starfsemi sem nauðsynlegt er að sé innan haftasvæðis flugverndar auk þess að sjá um hagnýtingu Keflavíkurflugvallar í þágu öryggis- og varnarmála. Fjármálaráðherra fer með hlut ríkisins í félaginu en forstjóri er Björn Óli Hauksson rekstrarverkfræðingur.

Starfsemi Isavia skiptist í átta svið: fjármálasvið, flugumferðarsvið, flugleiðsögusvið Keflavík, flugvalla- og leiðsögusvið, flugvallarsvið Keflavík, flugverndarsvið Keflavík, viðskiptasvið Keflavík og rekstrarsvið Keflavík. Dótturfélög Isavia eru Tern Systems hf., sem annast hugbúnaðargerð fyrir flugleiðsögukerfi, Flugfjarskipti ehf., sem annast fjarskiptaþjónustu við flugvélar, og Fríhöfnin ehf., sem annast rekstur fríhafnarverslana. Starfsmenn félaganna eru alls um 700 og áætluð velta 13 - 15 milljarðar króna.

Isavia ohf.