Styrkveitingar
Isavia leggur samfélagsmálefnum lið með styrkveitingum.
Isavia vill leggja sitt af mörkum til þess að metnaðarfullt starf á ýmsum sviðum samfélagsins fái dafnað. Félagið og dótturfélög þess Fríhöfnin og Tern Systems hafa átt samstarf við fjölda aðila og styrkt margvísleg metnaðarfull verkefni á undaförnum árum. Til að skerpa á málaflokknum hefur félagið stofnað Styrktarsjóð Isavia með áherslu á:
- Forvarnarverkefni fyrir ungmenni
- Líknarmál
- Góðgerðarmál
- Umhverfismál
Úthlutað verður úr sjóðnum árlega.
Dæmi um verkefni sem hlutu styrk á árinu 2011 eru:
Styrktarsjóður Isavia hjá Landsbjörgu - stuðningur við björgunarsveitir Slysavarnafélagsins Landsbjargar. Tilgangur sjóðsins er að efla hópslysaviðbúnað björgunarsveita félagsins með sérstaka áherslu á hlutverk björgunarsveita í viðbúnaðaráætlunum áætlunarflugvalla. Markmið verkefnisins er að björgunarsveitir, og þar með viðbúnaðarkerfi landsins, séu ávallt sem best búnar til þess að takast á við hópslys. Verkefnið er til þriggja ára og ráðgerir Isavia að styrkja björgunarsveitir SL um 5 milljónir króna árið 2011 og 8 milljónir árið 2012 og 2013, samtals um 21 milljón króna.
Isavia styður börn í Sómalíu – Isavia styrkti starf Rauða krossins í Sómalíu með tvö þúsund króna framlagi fyrir hvern fastan starfsmann hjá félaginu og dótturfélögum Fríhöfninni og Tern Systems, samtals um 1,5 milljónir króna. Alþjóða Rauði krossinn er eina alþjóðlega hjálparstofnunin með starfsemi í suðurhluta Sómalíu og rekur 39 heilsugæslustöðvar og 15 matardreifingarstöðvar.
Björn Óli Hauksson forstjóri Isavia var staddur í Eþíópíu frá 1992 til 1993. „Það er alveg hrikalegt að koma inná svæði þar sem þúsundir barna eru sveltandi og mjög illa útlítandi og horfa á þúsundir manna skrönglast yfir landamærin,“ segir Björn.
Önnur verkefni sem hlutu styrk á árinu voru hreinsunarverkefni í kjölfar eldgossins í Grímsvötnum en sjö slökkviliðsmenn frá Isavia tóku þátt í hreinsunarstarfinu í um viku tíma og höfðu með sér stóra fjórhjóladrifna slökkvibifreið frá Reykjavíkurflugvelli sem búin er öflugum vatnsdælum ásamt 6.000 lítra vatnstanki. Þann 14. nóvember færðu svo tveir slökkviliðsmenn Isavia ásamt Birni Óla Haukssyni forstjóra félagsins og Hauki Haukssyni framkvæmdastjóra flugvalla- og mannvirkjasviðs bóndanum Ástþóri Skúlasyni á Melanesi á Rauðasandi sexhjól að gjöf frá Isavia. Ástþór lamaðist fyrir neðan mitti í bílslysi fyrir nokkrum árum og hefur síðan verið í hjólastól.
Umsóknareyðublað vegna styrkja má finna á síðu Isavia.
