Framkvæmdir á fjórðu hæðinni

Unnið er hörðum höndum að því að klára fjórðu hæð austurálmunnar, en þar verður skrifstofurými fyrir starfsfólk Isavia.

Framkvæmdir við fjórðu hæðina hófust í fyrra, en gert er ráð fyrir því að hæðin verði tekin í notkun í lok þessa árs.

Um er að ræða 1.450 fermetra skrifstofurými, sem tengt hefur verið við skrifstofur í Norðurbyggingu flugstöðvarinnar með göngubrú. Í meðfylgjandi myndbandi er hægt að sjá hvernig hæðin lítur út núna á meðan á framkvæmdum stendur.

Framkvæmdir við austurálmuna sjálfa hófust árið 2021 og hefur hún verið tekin í notkun í áföngum. Árið 2023 opnaði nýr komusalur og farangursmóttaka og fyrr á þessu ári fóru fyrstu farþegarnir í gegnum landgöngubrýrnar og rútuhliðin á annarri hæð álmunnar.

Þegar fram í sækir verður þriðja hæðin notuð til að taka móti gestum sem koma til Íslands frá löndum utan Schengen svæðisins.