← Öll þjónusta

Aðstoð á flugvellinum - PRM

Við á Keflavíkurflugvelli gerum okkar besta til að gera ferðalagið sem auðveldast fyrir gesti okkar og sérstaklega þá sem þurfa á aukinni aðstoð að halda. Hér að neðan er farið yfir helstu þætti PRM þjónustunnar og spurningar sem gætu vaknað.

Gæðastaðlar fyrir PRM þjónustu
Sækja pdf skjal

Hvernig fæ ég aðstoð?

Við bókun flugferðar

Við bókun flugferðar er hægt að óska eftir séraðstoð fyrir fólk með skerta ferðafærni hjá viðkomandi flugfélagi. Sjá upplýsingar um þjónustu flugfélaga hér fyrir neðan.

Mikilvægt er að muna láta flugfélagið vita um óskir um séraðstoð að minnsta kosti 48 tímum fyrir brottför.

Séraðstoðin fylgir flugfarþegum frá upphafi til enda ferðar sé þess óskað og er farþegum að kostnaðarlausu. Þjónustan býðst allt frá því að farþegar koma á flugvöllinn, þar til í sæti flugvélar og eftir lendingu að samgöngutæki á flugvallarsvæðinu.

FAQ

Þarftu aðstoð?

PRM farþegum býðst aðstoð á flugvellinum þeim að kostnaðarlausu.

PRM stendur fyrir „Persons with Reduced Mobility“ sem er yfirhugtak yfir einstaklinga með fötlun og/eða skerta hreyfigetu sem þarfnast aðstoðar við að komast um flugvöll og úr eða í flugvél.
Mikilvægt er að tilkynna flugfélagi, umboðsaðila hans eða ferðasala, um þörf þína fyrir aðstoð með a.m.k. 48 klst. fyrir áætlaðan brottfarartíma flugs. Tilkynnið einnig ef þið ætlið að ferðast með hjálpartæki eða þjónustudýr.
Best er að panta þjónustuna þegar verið er að bóka farmiðann en ef það gleymist, eða ákveðin þjónustuþörf er ekki í boði í bókunarferlinu, skal hafa samband við flugfélagið með símtali eða tölvupósti.
Það er á ábyrgð flugfélagsins að senda PRM beiðnina þína með a.m.k. 36 klst. fyrir áætlaðan brottfarartíma flugs. Flugfélagið sem þú ferðast með sér um að bóka PRM þjónustuna á bæði brottfarar- og komuflugvöllum ferðar þinnar. Ef þjónustubeiðni berst ekki flugvellinum með þessum fyrirvara getur orðið bið á þjónustunni.
Við mælum með að gestir sem óska eftir séraðstoð séu komnir á flugvöllinn 2,5 klukkustundum fyrir brottför. Hægt er að fá séraðstoð allt frá bílastæði eða biðstöð flugrútu og leigubíls.
Hér finnur þú nánari upplýsingar um samgönguleiðir til og frá flugvellinum. Þar finnur þú einnig kort af flugvellinum.

Einkabíll
Farþegi með stæðiskort fyrir hreyfihamlaða getur farið á eigin bíl og lagt í stæði við flugstöðina. Nokkrir aðilar bjóða upp á bílastæðaþjónustu á Keflavíkurflugvelli og er þá bíllinn færður án þjónustugjalds frá flugstöð á langtímastæði og honum skilað aftur við komustæði við heimkomu. Panta þarf þjónustuna fyrirfram. Greitt er fyrir stæðið samkvæmt gjaldskrá viðkomandi fyrirtækis en betra verð getur fengist ef pantað er á netinu og tímanlega.
Flugrúta
Hreyfihamlaðir farþegar geta pantað akstur hjá Kynnisferðum gegnum svokallaða Flybus+ þjónustu, sem útvegar leigubíl á verði flugrútumiða. Panta þarf farið með a.m.k. 48 klst. fyrirvara og taka þarf fram hvort farþegi þurfi á bíl með ramp eða lyftu að halda. Allir farþegar í bílnum þurfa að kaupa flugrútumiða.
Leigubíll
Panta þarf leigubíl með rampi eða lyftu með fyrirvara, þar sem framboð slíkra bíla er takmarkað.
Strætó
Vagnar Strætó sem ganga á milli höfuðborgarsvæðisins og Keflavíkurflugvallar eru ekki aðgengilegir fyrir hreyfihamlaða einstaklinga.
Við brottför er hægt að fá séraðstoð við að komast leiðar sinnar allt frá því að komið er á flugvöllinn og þar til er sest í flugsætið. Þetta er m.a. aðstoð við:
- Komast frá tilgreindum komustað á Keflavíkurflugvelli að innritunarborði.
- Innritun og innritaður farangur
- Komast frá innritunarborði að flugvél eftir að hafa farið í gegnum öryggisleit og landamæraeftirlit ef við á.
- PRM farþegar geta óskað eftir sérstökum leitarklefa fyrir handleit í Öryggisleit.
- Komast að salerni.
- Fara um borð í flugvél með hjálp hjólastóls, lyftu eða annarrar aðstoðar eftir því sem við á.
- Koma handfarangri fyrir í flugvél.
Við komu á flugvöllinn skaltu láta vakstjóra PRM þjónustu vita af komu þinni með einum af eftirfarandi hætti:
- Í kallkerfi á sérmerktu bílastæði brottfaramegin við norðurhlið flugstöðvar.
- Við innritunarborð afgreiðsluaðila viðkomandi flugfélags.
- Í þjónustuveri í brottfararsal, hér finnur þú kort af staðsetningu þjónustuvers. Þjónustuverið er opið frá kl. 4:00 eftir miðnætti og til kl. 23:00 alla daga vikunnar. Utan opnunartíma er farþegum beint að kallstaur sem er staðsettur við inngang móttökunnar þar sem hægt er að kalla eftir PRM þjónustu.
- Við brottför býðst þér aðstoð við að komast leiðar þinnar allt frá því að þú kemur á flugvöllinn og þar til þú sest í flugsætið þitt.
Mikilvægt er að þú látir vita af þér þó að þú þurfir ekki aðstoð alla leið í gegnum flugstöðina. Þannig veit vakstjóri PRM þjónustu af þér, veit hverjar óskir þínar og þarfir eru og þið getið skipulagt þjónustuna saman.
Við komu eða millilendingu býðst þér aðstoð við að komast leiðar þinnar allt frá flugsætinu þínu að næsta ferðamáta innan svæði flugvallarins.
Starfsmenn PRM þjónustu eru reiðubúnir að aðstoða þig við að:
- Ná í handfarangurinn þinn
- Fara frá borði flugvélar með hjálp lyftu, hjólastóla eða annarra aðstoðar eftir því sem við á
- Komast að salerni
- Komast frá flugvél, í gegnum landamæraeftirlit ef við á, sækja farangur og fara í gegnum tollskoðun
- Komast frá komusal að næsta ferðamáta innan svæði flugvallar
- Ná næsta tengiflugi
Farþegar með skerta hreyfigetu (PRM) geta óskað eftir aðstoð PRM-starfsfólks við heimsókn í Ísland Duty Free í Keflavíkurflugvelli. PRM-starfsfólk getur fylgt farþegum til og frá verslun og aðstoðað við almenna þjónustu innan verslunarsvæðis flugstöðvarinnar. Hins vegar er mikilvægt að taka fram að PRM-starfsfólk hefur ekki heimild til að aðstoða við sjálf innkaupin, þar á meðal vöruval, greiðslur eða ákvarðanatöku um kaup.
Aðstoð sem tengist vöruvali, greiðslum og almennri aðstoð við verslun er á ábyrgð starfsfólks Ísland Duty Free, sem er til staðar í verslunarsvæðinu til að veita slíka þjónustu. Þessi verkaskipting tryggir að farþegar fái viðeigandi aðstoð frá þjálfuðu starfsfólki bæði í þjónustu og við verslun.
Farþegum er ráðlagt að láta PRM-starfsfólk vita með fyrirvara ef þeir hyggjast versla í Ísland Duty Free, svo hægt sé að tryggja nægan tíma til þess að versla án þess að valda seinkun á ferðalaginu.
Starfsmenn PRM veita ekki aðstoð:
- Við að borða og/eða drekka
- Við meðhöndlun og/eða inntöku lyfja, sama í hvaða formi þau eru
- Inni á salerni
- Við persónuleg hreinlætisþrif
- Við að versla á veitingastöðum eða í verslunum.
Til að tryggja að allt gangi vel fyrir sig og ferðalagið þitt verði eins þægilegt og mögulegt er, þá er gott að hafa eftirfarandi atriði í huga:
- Vertu raunsæ/-r á eigin þarfir, sérstaklega ef þú getur ekki gengið langar vegalengdir án aðstoðar. Fjarlægðin á milli innritunarborðs og flugvélar getur verið mjög löng.
- Athugaðu hvort flugfélagið eða ferðaskrifstofan getur uppfyllt þarfir þínar.
- Ekki gera ráð fyrir að aðstoð sé í boði fyrirvaralaust. Pantaðu þjónustuna með a.m.k. 48 klukkutímum fyrir áætlaðan brottfarartíma.
- Ekki gera ráð fyrir að starfsmenn PRM þjónustu viti hvernig best er að lyfta eða færa þig, þó þeir hafi þjálfun í því. Best er að leiðbeina þeim um hvað hentar þér.
Samkvæmt alþjóðasáttmálum og EU lögum þá eru takmarkanir á bótum fyrir týndan eða ónýtan farangur, sem gildir einnig um hjálpartæki. Það getur haft í för með sér að sú fjárhæð mun ekki fullgreiða kostnaðinn fyrir viðgerðir eða nýtt hjálpartæki. Það er mælt með að þú athugir tryggingarnar þínar áður en þú ferðast og gangir úr skugga um að þær geti tryggt hjálpartækið þitt.
Flugfélög nota alþjóðlega kóða til þess að skilgreina þá þjónustu sem veita skal PRM farþegum. Eftirfarandi eru kóðarnir sem notaðir eru:
- WCHR: fyrir farþega sem geta ekki gengið langar vegalengdir.
- WCHS: fyrir farþega sem geta ekki gengið upp og/eða niður tröppur.
- WCHC: fyrir farþega sem geta ekki gengið.
- DEAF: fyrir farþega sem eru með heyrnaskerðingu eða eru heyrnalausir.
- BLND: fyrir farþega sem eru með sjónskerðingu eða eru blindir.
- DEAF/BLND: fyrir farþega sem bæði eru blindir og heyrnalausir.
- DPNA: farþegi með vitsmuna- og/eða þroskaskerðingu.
Eftirfarandi ástæður geta leitt til þess að flugrekandi hafni bókun þinni.
Öryggi: Ef þú getur hvorki spennt öryggisbelti sjálfur, sett upp súrefnisgrímu og björgunarvesti né yfirgefið flugvélina sjálfur í neyð, með nokkrum hætti, getur flugrekandi hafnað því að þú ferðist nema þú ferðist með aðstoðarmanni.
Stærð loftfars: Ef loftfar er ekki nægilega stórt til að hægt sé að taka hjólastól þinn um borð, ber flugrekanda að upplýsa þig um slíkt eins fljótt og auðið er. Flugrekanda ber jafnframt skylda til að bjóða þér annað flug þar sem hægt er að taka hjólastól þinn um borð.
Ef þú ert óviss um hvort þú þurfir að ferðast með aðstoðarmanni er mælt með því að hafa samband við flugfélag, þjónustuaðila eða ferðaskrifstofu.
Segllyfta er í boði á Keflavíkurflugvelli, fyrir þá sem kjósa afnot af henni þegar farið er um borð eða frá borði flugfars. Æskilegt er að beiðni um afnot af lyftunni berist með beiðni um PRM þjónustu, en einnig er hægt að óska eftir henni við upphaf þjónustunnar.
Þegar þú pantar PRM-aðstoð hjá flugfélagi eða ferðaskrifstofu kunna spurningar sem lagðar eru fyrir þig að virðast íþyngjandi. Þær eru þó nauðsynlegar til að tryggja að þú fáir þá þjónustu sem þú þarft.
Eftirfarandi eru dæmi um spurningar sem þú gætir átt von á:
- Hverjar eru þarfir þínar?
- Getur þú gengið langar vegalengdir?
- Ef þú þarft hjólastól, munt þú nota eigin hjólastól?
- Er hjólastóllinn samanbrjótanlegur?
- Hversu þungur er hjólastóllinn?
- Hversu stór er hjólastóllinn (hæð og breidd)
- Þarftu aðstoð við að ýta hjólastólnum?
- Geturðu gengið upp og niður stiga?
- Þarftu aðstoð við að fara um borð í flugvél og/eða við að fara frá borði?
- Geturðu farið úr hjólastólnum án aðstoðar?
- Geturðu gengið innan flugvélarinnar eða þarftu flugvélahjólastól um borð? (Athugaðu að sem ekki allar flugvélar eru með slíkan hjólastól).
- Þarf salerni flugvélarinnar vera aðgengilegt fyrir flugvélahjólastól til þess að þú getir nýtt þér það?
- Hvaða aðstoð, ef einhverja, þarftu á að halda á meðan á fluginu stendur?
- Hvaða sætistegund hentar þér best?
- Munt þú taka með þér einhvern sjúkrabúnað?
- Ertu með astma eða aðra öndunarerfiðleika?
- Getur þú spennt öryggisbeltið sjálf/ur, sett upp súrefnisgrímu og yfirgefið flugvélina sjálf/ur í neyð?
- Ertu með málmígræðslur í líkamanum (svo sem skurðplötur, skrúfur eða gervilimi)?
Keflavíkurflugvöllur leggur áherslu á faglega og virðingarfulla þjónustu við alla farþega, þar á meðal farþega með skerta hreyfigetu (PRM). Ef þú ert óánægð/ur með veitta aðstoð eða þjónustu er þér bent á að senda kvörtun svo hægt sé að fara yfir málið og bregðast við því.
Kvartanir sem varða PRM-þjónustu á Keflavíkurflugvelli skulu berast skriflega á netfangið [email protected]. Til að auðvelda meðferð málsins er æskilegt að eftirfarandi upplýsingar séu teknar fram:
1. Dagsetning
2. Tími ferðar
3. Flugnúmer
4. Stutt lýsing á atvikinu og því sem fór úrskeiðis.
Stefnt er að því að svar við kvörtunum berist innan fimm (5) virkra daga frá móttöku þeirra.
Meðferð persónuupplýsinga sem berast í tengslum við kvartanir fer fram í samræmi við gildandi persónuverndarlöggjöf. Upplýsingarnar eru eingöngu notaðar í þeim tilgangi að afgreiða kvörtunina og eru varðveittar með öruggum hætti.
Ef svar eða úrvinnsla okkar á kvörtuninni er ekki fullnægjandi, getur þú leitað til Samgöngustofu, sem fer með eftirlit með réttindum farþega og aðgengismálum.
Flugvöllurinn aðhyllist þá stefnu að líta skuli á hreyfihamlaða farþega („PRM-farþega“) sem einstaklinga með mismunandi sérþarfir og þjónustuþarfir. Flugvöllurinn leitast við að veita sérhverjum PRM-farþega sérþjónustu, sniðna að hans þörfum, með virðingu og án mismununar og að taka tillit til óska einstaklingsins um sjálfstæði.
Opna Gæðastaðla fyrir PRM-þjónustu