Árið 2024 var viðburðaríkt í KEF

Undir lok ársins var opnun annarrar hæðar austurálmu rétt handan við hornið, nýtt veitingasvæði komið í fullan rekstur, ásamt fleiri nýjum veitingastöðum og verslunum sem hafa bæst við flóruna á flugvellinum. Á síðasta ári hafa umhverfis- og samfélagsmál verið í forgrunni í bæði framkvæmdum og rekstri flugvallarins. Hér verður farið stuttlega yfir stóru áfangana á Keflavíkurflugvelli árið 2024.

Framkvæmdir gengu vel á Keflavíkurflugvelli árið 2024 og var góð samvinna allra ólíkra aðila lykillinn að velgengninni. Framkvæmdir við aðra hæð á nýrri austurálmu voru þar efst á blaði.

Austurálman er lykilþáttur í framtíðarþróun flugvallarins. Fullkláruð verður hún stærri en upphaflega flugstöðvarbyggingin sem vígð var árið 1987 og hýsir hún m.a. nýtt farangursflokkunarkerfi, stærra veitinga- og biðsvæði, auk nýrra landganga. Árið 2023 var fyrsta hæð álmunnar tekin í notkun þegar nýr töskusalur opnaði sem stórbætti upplifun og aðgengi fyrir komufarþega í flugstöðinni.

Árið 2024 hófust líka framkvæmdir við stækkun suðurbyggingar en með stækkun hennar skapast aukið rými fyrir farþega sem gerir biðina eftir ferðalaginu enn ánægjulegri.

Nýtt flughlað prófað á korti

Í apríl fór fram „Desktop trial“ eða skrifborðsæfing fyrir nýtt flughlað við austurálmu flugstöðvarinnar. Verkefnið er nátengt austurálmuverkefninu en á nýja flughlaðinu verða m.a. fjögur ný flugstæði og snjóbræðslukerfi.

Svona æfing er mikilvægur þáttur í að búa starfsfólk flugvallarins og annarra fyrirtækja undir það að taka flughlaðið í gagnið. Þar sem framkvæmdinni er ekki lokið og heildstæð prófun með flugvélum er erfið í framkvæmd, þá er skrifborðsæfing gott tól til að greina áður óþekkt atriði sem þarf að laga og fara í gegnum ferlana með endanotendum.

Fjöldi hagaðila, bæði innri og ytri, koma að verkefni sem þessu og er mikilvægt að allir þessir aðilar komi saman til fara í gegnum starfsemina sem verður á flughlaðinu. Fulltrúar frá öryggisstjórnun, flugturni, stjórnstöð, framkvæmdadeild, flugvallarþjónustu, farþegaflutningum, hönnuðum, Airport Associates og Icelandair tóku þátt. Prófanir eins og þessar eru hluti af ORAT ferlinu sem er áhrifaríkt ferli til að styðja við farsæla innleiðingu á nýjum mannvirkjum og innviðum flugvallarins.

Framkvæmdir við stækkun suðurbyggingar hófust

Framkvæmdir við stækkun suðurbyggingar flugstöðvarinnar hófust í ársbyrjun 2024 og hefur miðað vel. Með stækkun suðurbyggingar skapast aukið rými fyrir farþega sem gerir biðina eftir ferðalaginu ánægjulegri.

Suðurbyggingin stendur sunnan við gömlu flugstöðina sem nú er gjarnan kölluð norðurbyggingin. Byggingin var opnuð árið 2001 og stækkuð rúmum áratug síðar til að sinna auknum farþegafjölda og bæta upplifun farþega. Framkvæmdir við stækkun suðurbyggingar hófust í janúar 2024 og eru áætluð verklok á þessari 1.900 fermetra stækkun um mitt ár 2025. Breytingunum fylgir stórbætt aðstaða fyrir farþega, til að mynda með stærra biðrými, nýjum brottfararhliðum, auk þess sem veitinga- og verslunarrými stækkar.

Framkvæmdum við austurálmu miðaði vel

Að mörgu þarf að huga þegar komið er að byggingu stórrar álmu á borð við austurálmu. Framkvæmdum við austurbyggingu Keflavíkurflugvallar miðaði vel á árinu og þegar álman verður tekin í gagnið fjölgar landgöngum í flugvélar um fjóra, auk þess sem til viðbótar koma tvö rútuhlið. Landgangarnir tengjast tveimur turnum, sem fengið hafa vinnuheitin Mars 1 og Mars 2. Eflaust gera ekki allir sér grein fyrir því hversu mikla vinnu þarf að fara í eingöngu til að geta keyrt flugvélar að nýju byggingunni.

Jarð- og steypuvinna við nýju flughlöðin við turnana tvo var heilmikið verkefni í sumar en þau eru alls um 20.000 fermetrar að stærð, sem samsvarar um þremur fótboltavöllum. Lengri tíma tók að steypa hlöðin vegna þess að veðrið lék ekki við okkur í þessum efnum í sumar frekar en aðra Íslendinga. Steypuvinnan öll við austurálmuna og flugvélastæðin samtals kallaði á um 20.000 rúmmetra af steypu og notuð voru 2.300 tonn af stáli í verkið.

Landgangarnir komu með krókaleiðum

Í haust tókust starfsmenn Keflavíkurflugvallar og aðrir sérfræðingar á við stórt verkefni þegar nýir landgangar við austurálmu komu til landsins. Þegar önnur hæð austurálmu verður tekin í notkun að fullu fjölgar landgöngum í flugvélar um fjóra en landgangarnir tengjast tveimur turnum.

Landgangarnir, sem eru framleiddir af kínverska framleiðandanum CIMC Tianda, höfðu ferðast langa leið þegar þeir komu til landsins.

Frá Shezen í Kína á Keflavíkurflugvöll

Fyrst þurfti skipið sem flutti þá frá Shenzen í Kína að sigla fyrir Góðrarvonarhöfða í Suður-Afríku vegna þess að átökin við Rauðahaf hafa gert siglingar um Súezskurðinn hættulegri en ella. Eimskip flutti svo landgangana frá Rotterdam til Sundahafnar. Vegna þyngdar, lengdar og hæðartakmarkana var ekki hægt flytja brýrnar frá Sundahöfn í gegnum Reykjavík, heldur þurfti að keyra með þá til Þorlákshafnar og svo áfram Suðurstrandarveg. Takmarkanir á umferð í gegnum Grindavík urðu til þess að Krýsuvíkurvegurinn var farinn inn á Reykjanesbraut.

ET flutningar sáu um flutninginn og fóru fjórar ferðir að kvöldi til en fyrirtækið hefur sérhæft sig á sviði stórflutninga og lögregla fylgdi bílnum alla leiðina. Með opnun landganganna, sem og tveggja rútuhliða í austurálmu, hækkar þjónustustig á flugvellinum og upplifun gesta verður enn betri fyrir vikið.

Landgangarnir og turnarnir mynda saman svokallað MARS-kerfi (e. Multiple Aircraft Ramp System) og hafa þessir tveir fengið vinnuheitin MARS 1 og MARS 2. Þetta kerfi þýðir að hægt er að nýta turnana og landgangana með sveigjanlegri hætti en eldri landganga og geta þeir jöfnum höndum þjónustað eina stærri vél eða tvær smærri.

Fjölbreytt atvinnutækifæri kynnt fyrir ungmennum á KEF

Starfsfólk KEF tók virkan þátt í árlegri starfsgreinakynningu á Suðurnesjum og kynntu áhugaverð tækifæri á flugvellinum fyrir ungu fólki og nemendum á efsta stigi grunnskóla. Í ár mættu nítján starfsmenn flugvallarins til að ræða við unga fólkið og kynntu ýmis atvinnutækifæri á flugvellinum. Þetta eru m.a. störf innan sviðs flugverndar, flugöryggis, öryggisleitar, verkfræðinga, mannauðsráðgjafa og farþegaaksturs svo fáein séu nefnd. Hver deild mætti með tæki og tól sem notuð eru í hverju starfi og fengu nemendur að máta sig við störfin og fá innsýn inn í hvernig vinnudagur hópsins lítur út.

Á flugvellinum er alltaf verið að leita að góðu fólki til að starfa og það er því ánægjulegt að kynna unga fólkinu fyrir öllum þeim fjölbreyttu tækifærum sem leynast á KEF. Yfir 100 starfsgreinar vítt og breitt úr atvinnulífinu voru kynntar nemendunum, sem komu úr 8. og 10. bekkjum allra grunnskóla Suðurnesjanna, auk fleira ungs fólks m.a. úr Fjölbrautaskóla Suðurnesja. Starfsgreinakynningar sem þessar eru öflugt verkfæri til að hvetja ungt fólk af svæðinu til að tengjast og kynnast ýmsum tækifærum á vinnumarkaði. Markmiðið er að nemendurnir finni sér áhugaverð störf og fái aðstoð við að skilja hvaða hæfni og nám þeir gætu þurft að sækja í framtíðinni.

Veitingasvæðið Aðalstræti opnaði við mikla lukku matgæðinga

Veitingasvæðið Aðalstræti opnaði í haust í brottfararsal Keflavíkurflugvallar. Alls eru þrír nýir veitingastaðir á veitingasvæðinu; hamborgarastaðurinn Yuzu, ítalski veitingastaðurinn La Trattoria og mexíkóski matstaðurinn Zócalo. Með opnun þeirra hefur úrval veitinga á flugvellinum aukist enn frekar og ættu flest sem þangað sækja að geta fundið sér eitthvað við sitt hæfi.

Íslenska hönnunarstofan HAF Studio hannaði nýja veitingasvæðið þar sem áhersla var lögð á að skapa heildrænt rými sem heldur vel um gesti og stemningu eins og gerist best í miðborg Reykjavíkur.

Fataverslunin Húrra opnaði

Húrra Reykjavík, ein vinsælasta fataverslun landsins, opnaði nýja og glæsilega verslun í brottfararsal Keflavíkurflugvallar í sumar. Viðbótin vakti strax mikla lukku hjá gestum flugvallarins sem geta nú keypt fatnað og strigaskó frá þekktum og vinsælum vörumerkjum á borð við Arc‘teryx, Salomon, OpéraSPORT, Sporty & Rich, Norse Projects, Carhartt WIP, Stone Island og Birkenstock.

Loksins sneri aftur sem bar & café

Loksins bar var rekinn á Keflavíkurflugvelli um árabil og opnaði í breyttri og stærri mynd á síðasta ári. Staðurinn færðist um set á flugvellinum og er nú í suðurbyggingu flugvallarins við C-hliðin. Til viðbótar við gott úrval drykkja líkt og áður, býður Loksins Café & Bar nú upp á fjölbreyttan og nýjan matseðil. Á boðstólnum er ýmist góðgæti á borð við nýbakað, handgert bakkelsi, morgunverðarskálar, salöt, ferskt ciabatta og aðra girnilega heita rétti svo öll ættu að geta fundið eitthvað við sitt hæfi.

Endurbættar verslanir opnuðu

Glæsileg og endurbætt verslun Blue Lagoon Skincare opnaði í mars í fyrra en húðvörur þeirra hafa notið gífurlegra vinsælda meðal ferðalanga. Í versluninni er húðvörubar, þar sem gestir geta fengið sér sæti og prófað vörurnar ásamt því að fá persónulega ráðgjöf.

Ný verslun 66°Norður opnaði um sumarið þar sem áfram verður í boði frábært úrval útivistarfatnaðar. Rammagerðin opnaði sömuleiðis nýja og endurbætta verslun, þar sem vandaðar íslenskar hönnunar- og gjafavörur verða áfram í boði.

Amerísk matargerð í bland við íslenska rétti

Nýi íslenski veitingastaðurinn Keflavík Diner opnaði á síðasta ári á 1. hæð flugvallarins. Veitingaframboðið þar er sérsniðið að erlendum tengi- og brottfararfarþegum sem eru flestir á leið til Bandaríkjanna eða Bretlands. Keflavík Diner sækir innblástur sinn í sögu svæðisins og er með skírskotun til tímans þegar ameríski herinn var í Keflavík á árunum 1951-2006.

Fjölbreyttur matseðill með áherslu á ameríska matargerð í bland við íslenska rétti er í boði. Áhersla er lögð á einfaldan mat sem gestir sem fara um svæðið ættu að þekkja en með íslensku ívafi í hráefni og hönnun.