Sjálfbærni
Sjálfbærni í öndvegiSjálfbærni í öndvegi
Sjálfbærni er órjúfanlegur hluti af allri starfsemi okkar og lykilþáttur í ákvarðanatöku og framtíðarþróun félagsins. Við leggjum áherslu á að starfa á ábyrgan hátt, vera til fyrirmyndar í sjálfbærni og byggja upp traust með því að stuðla að velsæld samfélagsins.
Stefnan
Sjálfbærni er ein af stefnuáherslum félagsins. Tilgangur sjálfbærnistefnunnar er að styðja við að sjálfbærni sé ávallt í öndvegi í allri okkar starfsemi. Stefnunni fylgir skýr aðgerðaáætlun með mælanlegum markmiðum sem styðja við vegferð félagsins og þann árangur sem stefnt er að.
Sjálfbærnistefnan tekur mið af markmiðum stjórnvalda í umhverfis- og loftslagsmálum, líkt og kveðið er á um í eigandastefnu og öðrum lykiláherslum okkar í sjálfbærni. Félagið vinnur m.a. með heimsmarkmið Sameinuðu þjóðanna og er aðili að UN Global Compact sáttmálanum um ábyrga starfshætti.
Sjálfbærnistefnan lýsir jafnvæginu á milli umhverfis, samfélags og efnahags og skiptist í fjóra lykilþætti sem saman mynda eina heild sem styðja okkur við það að vera til fyrirmyndar í sjálfbærni á Íslandi. Starfsfólk og aðrir sem starfa fyrir félagið taka þátt í daglegum aðgerðum stefnunnar. Allir fá stuðning til að skilja hlutverk sitt svo stefnan verði hluti af daglegri ákvarðanatöku.
Lykilþættir
Ábyrgir viðskiptahættir
- Við byggjum upp sjálfbæran rekstur sem skapar langtímavirði
- Við vinnum að stöðugum umbótum í sjálfbærni með skýrum mælanlegum markmiðum og miðlum árangri okkar með gagnsæjum hætti
- Við stundum ábyrg og sjálfbær innkaup
Fólk og samfélag
- Við aukum sjálfbærni í öllu flugvallarsamfélaginu í krafti liðsheildar okkar og í góðu samstarfi við viðskiptavini og lykilsamstarfsfélaga
- Við vinnum með nærsamfélögum að sjálfbærni með velsæld og lífsgæði að leiðarljósi
- Við virðum mannréttindi og sýnum samfélagslega ábyrgð í gegnum virðiskeðju okkar
Loftslag og orka
- Við erum nettó-núll í eigin starfsemi á Keflavíkurflugvelli 2030
- Við vinnum markvisst að nettó-núll í flugstarfsemi á Íslandi fyrir árið 2050
- Við þekkjum og bregðumst við áhættum tengdum loftslagsbreytingum
Náttúra og umhverfi
- Við leggjum okkur fram um að vernda náttúruna, líffræðilega fjölbreytni og vistkerfi
- Við nýtum auðlindir á ábyrgan hátt og vinnum að markmiðum hringrásarhagkerfis í starfsemi okkar
- Við drögum úr neikvæðum áhrifum af starfsemi okkar, drögum úr mengun og vinnum að forvörnum
SjálfbærniupplýsingarSjálfbærniupplýsingar
Í ársskýrslu okkar veitum við heildstæða mynd af stjórnarháttum og starfsemi félagsins, sem og þeim áhrifum sem við höfum á samfélag, umhverfi og efnahag.Þar deilum við þeim árangri sem við höfum náð, áskorunum sem við stöndum frammi fyrir og framtíðarsýninni sem við stefnum að. Við hvetjum þig til að kynna þér skýrsluna og hvað við erum að gera til að auka sjálfbærni í starfsemi okkar.
Hljóðmælingar
Flugstarfsemi getur skapað hljóðmengun og við erum meðvituð um að reyna að lágmarka hana eins og kostur er og upplýsa nærsamfélagið um hljóðvistina í kringum Keflavíkurflugvöll.
Á síðustu árum höfum við unnið að mótvægisaðgerðum vegna þess ónæðis sem íbúar í nærumhverfi Keflavíkurflugvallar geta orðið fyrir. Þar á meðal má nefna innleiðingu nýrra flugferla og breytta notkun flugbrauta sem er framfylgt að teknu tilliti til öryggis- og umhverfisþátta, t.d. vinds og brautarskilyrða.
Við vöktum hljóðvist vegna flughreyfinga á Keflavíkurflugvelli allan ársins hring og eru hljóðmælar staðsettir á fjórum álagsstöðum í nærumhverfi vallarins. Auk þess var keyptur færanlegur mælir þannig að hægt sé að mæla á öðrum stöðum t.d. ef ábendingar berast frá ákveðnum svæðum í bænum eða í bæjarfélögum sem eru fjær flugvellinum en Reykjanesbær. Smelltu hér til að opna hljóðmælingakerfið.
Í kerfinu geta íbúar, hagaðilar og starfsfólk fylgst með flughreyfingum við völlinn og hljóðmælingum tengdum þeim. Hægt er að tilkynna ónæði vegna einstakra flughreyfinga í gegnum kerfið. Smelltu hér til að senda inn tilkynningu um ónæði (hávaðatilkynningu).
Loftgæði
Við vöktum styrk ýmissa efna í andrúmslofti. Loftgæðamælar eru staðsettir á Keflavíkurflugvelli og í nærumhverfi hans. Mældur er styrkur nituroxíða (NO og NO2) sem eru þau skaðlegu efni sem einna helst þarf að hafa áhyggjur af við starfsemi vallarins. Mælingar sýna að styrkur þeirra er yfirleitt lítill og ávallt undir viðmiðunarmörkum. Loftgæðaspár sem hafa verið gerðar fyrir Keflavíkurflugvöll fyrir allt að 14,5 milljónir farþega á einu ári sýna að þrátt fyrir þann fjölda yrði styrkur nituroxíða undir viðmiðunarmörkum. Rauntímaupplýsingar loftgæðamæla á og við Keflavíkurflugvöll má finna á loftgaedi.is
Loftslagsmál
Við erum meðvituð um þá ábyrgð sem hvílir á okkur varðandi loftslagsmál og losun gróðurhúsalofttegunda og vinnum með virkum og skipulögðum hætti að aðgerðum til þess að minnka kolefnisspor okkar og nýtum þekkingu okkar og reynslu við þróun nýrra og sjálfbærra lausna. Aðferðafræðin og útreikningar á kolefnisspori félagsins eru staðfestir af óháðum þriðja aðila samkvæmt ISO 14064-3 staðlinum
Við kolefnisjöfnum alla beina losun í starfseminni auk þess að kolefnisjafna aðra rekstrarþætti. Við það notumst við vottaðar kolefniseiningar samkvæmt kolefnisvottun Airport Carbon Accreditation.
Keflavíkurflugvöllur hefur kolefnisjafnað alla beina losun í starfseminni frá árinu 2018. Frá árinu 2021 höfum við einnig kolefnisjafnað aðra rekstrarþætti sem falla utan umfangs 1, líkt og rafmagn og hita, viðskiptaferðir starfsfólks og úrgang. Árið 2025 var umfang 1 1.473 tonn CO2 ígildi, umfang 2 403 tonn CO2 ígildi og umfang 3 2.014.943 tonn CO2 ígildi sem gerir heildar kolefnisspor Keflavíkurflugvallar 2.016.819 tonn CO2 ígildi. Þessi mikla hækkun milli ára er vegan þess að árið 2025 var fyrsta árið sem heildarlosun flugferða var reiknað, árin áður var aðeins losun frá flugtaki og lendingu í kolefnisútreikningunum.
Við kaupum vottaðar kolefniseiningar sem uppfylla kröfur Airport Carbon Accreditation (ACA) þar sem að Keflavíkurflugvöllur er með Level 3+ vottun. Árið 2026 voru keyptar 3.249 einingar fyrir Isavia samstæðuna fyrir rekstur ársins 2025 og keypti Keflavíkurflugvöllur 2.326 einingar, hver eining er losun á 1 tonni af CO2.
Brascarbon metanendurvinnsluverkefnið BCA-BRA-17 í Brasilíu – VCS3056
Verkefnið felur í sér bætta meðhöndlun búfjáráburðar á svínabúum í Mato Grosso do Sul í Brasilíu. Fljótandi búfjáráburður er meðhöndlaður í lokuðum loftfirrtum gerjunartönkum þar sem metan er fangað og nýtt til framleiðslu lífgass. Lífgasið er annað hvort brennt eða notað til orkuframleiðslu á staðnum. Í samanburði við fyrri aðferð, þar sem opnar safnþrær voru notaðar, dregur verkefnið úr losun gróðurhúsalofttegunda og bætir jafnframt meðhöndlun frárennslisvatns. Þetta hjálpar til við að minnka umhverfisáhrif á borð við lyktarmengun, vatnsmengun og aðra staðbundna mengunarþætti.
Endurheimt gróðurs á röskuðu landi í Síerra Leóne – VCS2401
Verkefnið miðar að því að endurheimta raskað land í Síerra Leóne með því að koma á fót nytjaskógrækt á svæðum sem hafa áður verið skógeydd eða eru með litla trjáþekju. Trjátegundir á borð við tröllatré (eucalyptus), akasíu, tekk, gmelinatré og corymbiatré eru gróðursettar til að binda kolefni úr andrúmsloftinu á sama tíma og framleitt er sjálfbært timbur, staurar, krossviður og lífmassi. Auk kolefnisbindingar er verkefninu ætlað að skapa umhverfislegan, félagslegan og efnahagslegan ávinning fyrir nærsamfélög með leigugreiðslum fyrir land, samkomulagi um ábataskiptingu og bættri landnýtingu.
Hreint drykkjarvatn fyrir heimili, stofnanir og samfélög í Nepal – GS12022
Verkefnið tryggir aðgang að hreinu drykkjarvatni í Nepal með uppsetningu fjölþrepa vatnshreinsikerfa fyrir heimili, stofnanir og samfélög. Kerfin fjarlægja svifagnir og örverumengun úr vatninu og draga þannig úr þörfinni fyrir að sjóða vatn með eldiviði eða öðrum kolefnisfrekum orkugjöfum. Samhliða minni losun gróðurhúsalofttegunda stuðlar verkefnið að bættri lýðheilsu, auknu aðgengi að hreinu vatni og aukinni vitund um hreinlæti. Þannig stuðlar það að öruggari vatnsþjónustu og minni álagi á lífmassaauðlindir.
Airport Carbon AccreditationAirport Carbon Accreditation
Alþjóðleg samtök flugvalla (ACI) standa saman að kerfi sem miðar að því að minnka kolefnislosun á flugvöllum. Keflavíkurflugvöllur er þátttakandi í þessu starfi og hefur lokið fjórða skrefi af sjö i í kolefnisvottun flugvallarins. Kolefnisvottunarkerfið, ACA (Airport Carbon Accreditation), metur hvort flugvellir séu að mæla kolefnislosun með réttum hætti og metur einnig árangur aðgerða til að minnka kolefnisspor þeirra. Markmiðið er að draga úr umhverfisáhrifum flugvalla með því að mæla kolefnislosun, stýra henni og minnka. Það er yfirlýst markmið Isavia að starfsemi Keflavíkurflugvallar verði orðin kolefnislausí eigin rekstri árið 2030. Þeim árangri verður náð með samstarfi við hagaðila, með virkri vöktun á umhverfisþáttum, orkuskiptum og með viðurkenndri kolefnisjöfnun eftir þörfum.
